दोलखा । नेकपा एमालेबाट दोहोरिएर स्थानीय तह निर्वाचन २०७९ मा उम्मेद्वारी दिने वडा अध्यक्षमध्येका एक हुनुहुन्छ, तामाकोशी गाउँपालिका वडा नम्बर ६ च्यामाका झनक बहादुर खत्री ।
आफ्नो पाँच बर्षे पहिलो कार्यकालमा कठिन परिस्थितीमा पनि सहज रुपमा जनतालाई सेवा दिएर जनताको मनमा बस्न सफल भएकै कारण पार्टीले आफूलाई पुनः उम्मेद्वार बनाएको खत्रीको भनाई छ । खत्रीले खानेपानीको चरम समस्या रहेको नसखर्क, देउराली विक टोल लगायतका ठाउँमा लिफ्टिङ मार्फत खानेपानीको व्यवस्था गरिदिनुभएको छ ।
वडा अध्यक्षका उम्मेद्वार खत्रीले विभिन्न ठाउँमा आरसिसी पुल निर्माण, एक हजारभन्दा धेरै भूकम्पपछिको आवास पुनर्निर्माण, जग्गा व्यवस्थापनसहित स्वास्थ्य चौकीको भवन निर्माण, वडा कार्यालयको भवन निर्माण, दर्जनौं विद्यालय भवन निर्माण, मठ मन्दिर निर्माण तथा संरक्षण, भू–क्षय नियन्त्रण, ग्रामीण कृषि सडक निर्माण, पैदल मार्ग निर्माण, घोरनागीमा ब्रह्माको मूर्ति स्थापना लगायतका काम गरिसक्नुभएको छ ।
आफू निर्वाचित भएपछि अघिल्लो कार्यकालमा पूरा गर्न नसकेका अधुरा कामलाई पूर्णता दिनुका साथै केहि नयाँ काम गर्ने योजना रहेको खत्रीले भिलेज खबरसँगको कुराकानीमा बताउनुभयो । देउराली–बाघखोर–जँघारे कृषि सडक ग्राभेल गरी बर्षैभरी चल्ने बनाउने, बर्थिङ सेन्टरका लागि थप भवनको व्यवस्था गर्ने, खानेपानीको मुहान नभएको समस्या समाधानका लागि हाईटेक प्रविधियुक्त खानेपानीको व्यवस्था गर्ने खत्रीको योजना छ ।
त्यसैगरी वडाका युवा जनशक्तिलाई उत्पादनमूलक कृषिमा आबद्ध गराएर स्थानीय स्तरमै रोजगारी सीर्जना गर्नुको साथै उत्पादित वस्तुलाई वडाले खरिद गरेर लिने, गुफ्ले देउराली क्षेत्रलाई पर्यटकिय क्षेत्रको रुपमा विकास गरी होमस्टे सञ्चालनको वातावरण बनाउने पनि खत्रीको प्रतिबद्धता छ ।
आफ्नो पहिलो कार्यकालमा कुनै भूगोल, जाति, क्षेत्र, राजनीतिक दल केहि नभनी निष्पक्ष रुपमा जनताको सेवा र विकास गर्नु र वडामा नेकपा एमालेको संगठन समेत बलियो रहेकोले आफूले निर्वाचन जित्ने खत्रीको दाबी छ । गठबन्धनलाई जित्न सक्नुहुन्छ त ? भन्ने प्रश्नमा खत्रीले भन्नुभयो, “अघिल्लो निर्वाचनमा पनि गठबन्धनलाई जितेरै आएको हो, तसर्थ मैले गठबन्धनलाई सामान्य रुपमा लिएको छु ।”
