दोलखा । आसन्न स्थानीय तह निर्वाचनमा भीमेश्वर नगरपालिका वडा नम्बर २ को वडा अध्यक्षका बलिया उम्मेद्वार मध्येका एक हुनुहुन्छ स्टालिन श्रेष्ठ ।
६७ बर्षको बर्षको उमेर वडा अध्यक्ष बन्ने चुनावी दौडमा रहनुभएका श्रेष्ठ नेकपा एमालेको तर्फबाट सर्वसम्मत उम्मेद्वार बन्नुभएको हो । वडाबासीको विश्वास जित्न सफल श्रेष्ठले २०७४ को स्थानीय निर्वाचनमा वडा अध्यक्ष बन्ने ठूलो इच्छा राख्नुभएको भएपनि उहाँ उम्मेद्वार हुन सक्नुभएको थिएन् ।
१७ बर्ष लामो समय नेपाल प्रहरीमा बिताएर अवकाश प्राप्त श्रेष्ठ सामाजिक क्षेत्रमा पनि उत्तिकै सक्रिय हुनुहुन्छ । २१ बर्षको उमेरमा २०३३ सालमा त्रिभुवन मावि मेलुङबाट प्रवेशिका परिक्षा उत्तिर्ण गर्नुभएका श्रेष्ठले पहिलो जागिरको रुपमा करिब ४ बर्ष औँलो रोग विरुद्धको अभियानमा सहजकर्ता बनेर काम गर्नुभएको थियो ।
देश संघिय संरचनामा जानुअघि वडा नागरिक मञ्चको संयोजक, विभिन्न विद्यालयको व्यवस्थापन समिति र मन्दिर संरक्षण समितिको नेतृत्व गरिसक्नुभएका श्रेष्ठ सामुदायिक मेलमिलापकर्ता समाज नेपाल, दोलखाको अध्यक्ष हुँदै हाल केन्द्रिय सदस्यको भूमिकामा हुनुहुन्छ । होटल तथा पर्यटन व्यावसायी संघ, दोलखाको अध्यक्षको जिम्मेवारीमा रहनुभएका श्रेष्ठ आफूले सामाजिक क्षेत्रमा खेलेको भूमिकाकै कारण पनि यसपालि आफूले निर्वाचन जित्ने भिलेज खबरसँग दाबी गर्नुभयो ।
श्रेष्ठको पहलमा वडाको विभिन्न विद्यालयमा आधुनिक भवन निर्माण, स्वास्थ्य क्लिनिक निर्माण, सडक निर्माण, २०७२ मा भूकम्प पिडित विभिन्न टोलबासीलाई अस्थायी आवास निर्माण भएका थिए ।
२०५३ सालदेखि सक्रिय राजनीतिमा लाग्नुभएका श्रेष्ठ नेकपा एमालेको वडा कमिटी सचिव, अध्यक्ष, नगर कमिटी सदस्य, क्षेत्रिय कमिटी सदस्य हुँदै हाल नेकपा एमाले जिल्ला कमिटी सदस्यको रुपमा दोश्रो कार्यकालमा हुनुहुन्छ ।
उमेरले सम्भवतः जिल्लाकै वडा अध्यक्षको जेठो उम्मेद्वार दाबी गर्ने श्रेष्ठ आफूमा थकान नभएर लामो अनुभव र खारिएको ज्ञान तथा वडाबासीको अटुट विश्वास रहेकोले पनि अबको पाँच बर्ष दिनरात नभनी जनताको सेवामा लागेर पार्टीकै छवि उच्च बनाउने बताउनुहुन्छ ।
