दोलखा । नेकपा एमालेको तर्फबाट प्रदेशसभा दोलखा ‘क’ का उम्मेद्वार नर बहादुर श्रेष्ठको चुनावी अभियान शनिबार आफ्नै जन्मथलोबाट शुरु भएको छ ।
प्रदेशसभा सदस्यको उम्मेद्वार बनेपछि पहिलो पटक जन्मथलो मेलुङ गाउँपालिका वडा नम्बर–४ भेड्पुको लामाटार पुग्नुभएका श्रेष्ठलाई आफ्नो वंशका जेष्ठजन काका पहल बहादुर श्रेष्ठले दही खुवाएर जितको लागि आर्शीवाद दिनुभएको थियो । श्रेष्ठको स्वागतमा लामाटार पिपलबोटको चौतारामा जम्मा भएका दर्जनौं स्थानीयले एमालेका प्रतिनिधिसभा सदस्यका उम्मेद्वार बालकृष्ण शिवाकोटी र श्रेष्ठलाई मतदान गरेर विजयी गराउन आतुर रहेको बताएका छन् ।
श्रेष्ठले आफू २०५४ मा तत्कालिन भेड्पु गाविसको अध्यक्ष, २०७४ मा गाउँपालिका अध्यक्ष र २०७८ मा नेकपा एमाले जिल्ला कमिटी अध्यक्षको उम्मेद्वार बनेपछि चुनावी अभियान सोहि पिपलबोटको चौतारोबाट शुरु गरेर विजयी भएको बताउनुभयो । यस पटक पनि आफ्नै जन्मथलोबाट चुनावी अभियान शुरु गर्नुभएका श्रेष्ठले आफ्नो जित हुने दाबी गर्नुभएको छ ।
आफ्नो वंशका जेष्ठजन काका पहल बहादुर श्रेष्ठबाट आर्शीवाद लिँदै नर बहादुर श्रेष्ठ ।
पार्टीको चुनावी अभियान अन्तर्गत नेकपा एमाले मेलुङ गाउँपालिका कमिटीले आयोजना गरेको बृहत् कार्यकर्ता भेला तथा प्रतिनिधिसभा र प्रदेशसभा सदस्यका उम्मेद्वारसँग छलफल कार्यक्रममा सहभागि हुनुअघि श्रेष्ठ आफ्नो जन्मथलो पुगेर आर्शीवाद लिनुभएको हो ।
भेड्पुको बुद्धचोकमा आयोजित बृहत् कार्यकर्ता भेला तथा उम्मेद्वारसँग छलफल कार्यक्रमलाई सम्बोधन गर्नुहुँदै श्रेष्ठले दोलखाको गरीबी र अभाव विरुद्धमा चुनौतिपूर्ण रुपमा लड्नका लागि एमाले तयार रहेको बताउँदै प्रतिनिधिसभार प्रदेशसभामा एमाले उम्मेद्वारलाई मतदान गरेर विजयी गराउन आव्हान गर्नुभयो ।
अर्को सन्दर्भमा श्रेष्ठले आफू निर्वाचित भएपछि स्थानीय तहलाई सक्षम र सबल बनाउन नीतिगत व्यवस्था गर्ने र विकास निर्माणलाई जोड दिएर सुगम क्षेत्रको रुपमा स्तरोन्नती गर्ने प्रतिबद्धता व्यक्त गर्नुभएको छ ।
