दोलखा । एमाले दोलखाले आगामी ४ मंसिरको निर्वाचनलाई समग्र शक्ति प्रदर्शनको अवसरका रुपमा लिदैं एकल रुपमा जितेर पुनः बलियो शक्तिका रुपमा स्थापित हुनेगरी निर्वाचनमा होमिने निर्णय लिएको छ ।
सोमबारको जिल्ला कमिटीको सातौं पूर्ण बैठकका निर्णय मङ्गलबार सार्वजनिक गर्नुहुँदै जिल्ला अध्यक्ष नरबहादुर श्रेष्ठले यस्तो जानकारी दिनुभएको हो । निर्वाचनलाई केन्द्रित गरि एमालेले दोलखामा पोलिटब्युरो सदस्यद्वय आनन्द प्रसाद पोखरेल र पार्वत गुरुङसहित केन्द्रीय सदस्य तथा जिल्ला ईन्चार्ज सरस्वती बस्नेत, जिल्ला अध्यक्ष तथा प्रदेश ‘क’ का उम्मेद्वार श्रेष्ठ, प्रतिनिधिसभा सदस्यका उम्मेद्वार बालकृष्ण शिवाकोटी तथा प्रदेश ‘ख’ का उम्मेदवार भरतबहादुर केसी रहेको ६ सदस्यीय उच्चस्तरिय निर्वाचन परिचालन कमिटी गठन गरेको छ ।
निर्वाचन क्षेत्र प्रदेश ‘क’ को नेतृत्व पार्वत गुरुङ र प्रदेश ‘ख’ को नेतृत्व आनन्दप्रसाद पोखरेलले गर्ने निर्णय गरिएको छ । त्यस्तै जिल्ला अध्यक्ष श्रेष्ठको नेतृत्वमा १ हजार १ सदस्यीय जिल्ला निर्वाचन परिचालन कमिटी, प्रदेश ‘क’ मा पूर्व जिल्ला अध्यक्ष तथा वागमती प्रदेश कमिटी सदस्य ईश्वरचन्द्र पोखरेल र प्रदेश ‘ख’ मा प्रदेश कमिटी सदस्य डबल पाण्डेको नेतृत्वमा बेग्लाबेग्लै परिचालन कमिटी गठन गरिएको छ ।
त्यस्तै, पार्टी परिचालनको जिम्मेवारी केन्द्रीय सदस्य सरस्वती बस्नेत, जनसंगठन प्रचारको नेतृत्व केन्द्रीय सदस्य रचना खड्का, सामाजिक सांस्कृतिक क्षेत्रको संयोजन पूर्व सांसद शान्ती पाख्रिन, वित्तीय सहकारी परिचालनको संयोजन हेमन्त चौंलागाईंले गर्नुहुनेछ । निर्वाचन प्रचार संयोजनको काम जिल्ला उपाध्यक्ष तथा प्रचार विभाग प्रमुख राजेन्द्र मानन्धरले गर्नुहुनेछ । प्रचारप्रसारका लागि उहाँको नेतृत्वमा ५ सय ५१ सदस्यीय कमिटी निर्माण भएको छ ।
त्यस्तै, प्रदेश कका लागि ऋषिकेश उप्रेती र प्रदेश ख का लागि कुमार खड्काको नेतृत्वमा १ सय ५१ सदस्यीय अलगअलग कमिटी गठन गरिएको पनि जिल्ला अध्यक्ष श्रेष्ठले जानकारी दिनुभयो ।
बैठकले विधान वमोजिम र रिक्त रहेका स्थानहरुमा जिल्ला कमिटी सदस्यमा शिवहरी थापा, छविलाल मोक्तान, बद्री वुढाथोकी, निराजन आचार्य, सूर्य बस्नेत, मेनुका सुवेदी, केशव कार्की, ज्ञान बहादुर जिरेल र डम्बर आचार्यलाई मनोनित गरेको छ । त्यसैगरी नेकपा एमाले मेलुङ गाउँपालिका इन्चार्जमा शिवहरी थापालाई जिम्मेवारी दिने निर्णय गरेको छ ।
