दोलखा । निर्वाचन क्षेत्र ‘ख’ बाट निर्वाचित बागमती प्रदेशसभाका सांसद भरत बहादुर केसीले विद्यार्थीहरुलाई मेहनत गरेर पढ्न आग्रह गर्नुभएको छ ।
शुक्रबार चरिकोटस्थित गौरीशङ्कर बहुमुखी क्याम्पसको ४४ औं वार्षिक उत्सव कार्यक्रमलाई सम्बोधन गर्नुहुँदै सांसद् केसीले पढाईको समयमा मेहनत गरेर पढ्न नसके जीवनमा पछुताउनुको विकल्प नरहेको भन्दै देशको जिम्मेवारी पाउनका लागि पनि अध्ययनमा उत्कृष्टता आवश्यक रहेको बताउनुभयो ।
कार्यक्रममा क्याम्पसको वर्तमान वस्तुस्थितीको बारेमा क्याम्पस प्रमुख शान्त बहादुर केसीले वार्षिक प्रतिवेदन मार्फत जानकारी गराउनुभएको छ । कार्यक्रमको अवसरमा उत्कृष्ट बर्ष प्राध्यापकको रुपमा रत्न बहादुर श्रेष्ठ, उत्कृष्ट कर्मचारीको रुपमा सुनिना श्रेष्ठ र उत्कृष्ट विद्यार्थीको रुपमा बिर्सम श्रेष्ठलाई पुरस्कृत गरिएको छ ।
क्याम्पस सञ्चालक समितिका अध्यक्ष अमृत राउतको अध्यक्षतामा भएको कार्यक्रममा नेपाली काङ्ग्रेस दोलखाका सभापति बर्मा लामा, नेकपा एमाले दोलखाका अध्यक्ष नर बहादुर श्रेष्ठ, नेकपा माओवादी केन्द्रका केन्द्रीय सदस्य नर बहादुर पाख्रिन, राप्रपा दोलखाका सदस्य पाण्डवसिंह पाण्डे, प्रमुख जिल्ला अधिकारी शिवराम गेलाल, नेपाल बार एसोसियसन दोलखा इकाईका अध्यक्ष तथा पूर्व क्याम्पस प्रमुख कृष्ण बस्नेत, गौरीशङ्कर क्याम्पसका नवनिर्वाचित स्ववियु अध्यक्ष शिरिस बस्नेत, पूर्व विद्यार्थी समाजका अध्यक्ष राम बहादुर श्रेष्ठ लगायतले शुभकामना मन्तव्य व्यक्त गरेका छन् ।
कार्यक्रममा क्याम्पसमा बर्षभरी भएका विभिन्न अतिरिक्त क्रियाकलापका विजयी विद्यार्थीहरु, परीक्षामा उत्कृष्टता हाँसिल गर्ने विद्यार्थीहरुलाई पुरस्कार वितरण गरिएको छ । त्यसैगरी विभिन्न छात्रवृत्ति कोषबाट दर्जनौं विद्यार्थीहरुलाई छात्रवृत्ति वितरण गरिएको छ ।
